學位論文
Permanent URI for this collectionhttp://rportal.lib.ntnu.edu.tw/handle/20.500.12235/73882
Browse
1 results
Search Results
Item 台語連詞kap副詞ê研究--兼論語言接觸下ê變化(2014) 李淑鳳; Lee, Shu-Feng本研究透過日治時期語料分別探討台語連詞kap副詞ê語意類型以及相關句式、用法，同時討論連詞kap副詞之間ê關聯性。最後，透過詞頻表現觀察連詞kap副詞tī現代台語內底ê變化kap發展。 台語tī過去百外冬來bat分別kap日語以及華語有過長期koh頻繁ê接觸，語言接觸ê結果，通常會帶來詞彙ê移借。根據Thomason& Kaufman(1988)ê「Borrowing scale」，tī接觸ê第二个坎站，也就是tī語言接觸khah頻繁小可ê階段，虛詞內底ê連詞kap副詞就會開始進入詞彙ê移借。但是，一直以來ê台語借詞ê相關研究lóng顯示台語真少移借虛詞。 另外一方面，就語言本身ê角度來講，連詞kap副詞之間一直存在oh--tit區別ê事實，tse相對mā代表in之間ê關係是密切ê。M̄-kú，一直以來ê連詞kap副詞ê研究lóng是連詞huān連詞，副詞huān副詞，真少kā in khǹg做伙討論，準做有khǹg做伙研究，mā是將視點khǹg tī按怎去將連詞kap副詞區別清楚，相對就忽略in之間hit層密切ê關係。Thomason & Kaufman語言接觸ê理論引起筆者同時探討連詞kap副詞ê動機，連詞kap副詞本身oh-tit區分ê事實支持筆者同時將連詞kap副詞納入研究ê必要性kap合理性。 本研究發現，台語ê連詞kap副詞之間tī句ê層次有真bā ê關係，in tī句法頂面有真kuân ê詞類兼類ê「共用」現象，tī句式頂面tsia̍p-tsia̍p「同現」，共同經營句意。因為這層密切ê語法關係，可能hōo連詞kap副詞tī移借ê過程產生一定程度ê關聯性，間接呼應Thomason& Kaufman(1988)ê理論。結果，咱發現，確實tī語言接觸真早期ê階段，日語kap華語ê連詞iah-sī副詞就開始進入台語。日語連詞因為欠缺漢字表記ê形態並無進入台語，日語副詞tī日本統治ê第二个十冬就進入移借ê高峰期；華語連詞kap副詞則是tī國民黨政府來台灣ê頭一个十冬就陸續進入台語。 日語ê副詞以及華語ê連詞kap副詞進入台語連詞kap副詞部門了後，kap原底ê詞彙之間有競爭mā有融合。整體來講，台語連詞kap副詞ê變化kap發展，因為kap華語頻繁ê接觸關係，受著華語真大ê影響。咱發現，nā是hit組類義詞群內底有包含台、華同形詞，hit个同形詞有真大ê機會會成做使用頻率siōng kuân ê詞，相對，類義詞群內底假使已經存在高使用率ê台、華同形詞，就連帶阻止華語借詞ê移入。雖罔台、華同形詞tī台語詞彙發展內底佔優勢，m̄-kú，猶原有例外，有濟濟台、華同形詞意外失落。文言詞tī現代台語文內底整體有明顯失落ê趨勢，卻是有一寡詞因為kap華語同形得著保存。